नितीन गडकरींना, दहशतवादी अकबर पाशाच्या सांगण्यावरून धमकी; पोलिसांच्या तपासात धक्कादायक खुलासा 

केंद्रीय मंत्री नितीन गडकरींना धमकी दिल्या प्रकरणी, धक्कादायक माहिती पोलीस तपासात पोलिसांच्या हाती लागली आहे. जयेश कांथा उर्फ शाकीर याने, बेळगावच्या तुरुंगात कैदी असलेला दहशतवादी संघटनेचा सदस्य अकबर पाशाच्या सांगण्यावरूनच नितीन गडकरींच्या कार्यालयात धमकीचा फोन केला असल्याची माहिती समोर आली आहे.

या प्रकरणाचा तपास नागपूर पोलीस करणार आहेत. प्रतिबंधित पीएफआय संघटनेचा अकबर पाशा हा सदस्य असून, बेळगाव कारागृहात बंद असलेल्या अकबर पाशासह त्याच्या इतर दहशतवादी साथीदारांची चौकशी नागपूर पोलीस करणार आहेत. दरम्यान जयेश उर्फ शाकीर हा पॉप्युलर फ्रंट ऑफ इंडिया या बंदी घालण्यात आलेल्या संघटनेच्या तसेच लष्करी ए तोयबा आणि दाऊद इब्राहिम, या लोकांच्या संपर्कात असल्याचे पुरावे पोलिसांच्या हाती लागल्याची माहिती पोलीस आयुक्तांनी दिली.

१४ जानेवारी आणि २१ मार्च रोजी बेळगावच्या तुरुंगातून केंद्रीय मंत्री नितीन गडकरींच्या नागपूर मधील जनसंपर्क कार्यालयात फोन करून जयेश पुजारीने धमकी दिली होती. यावेळी पहिल्या वेळेस १०० कोटी तर दुसऱ्या वेळेस १० कोटी रुपयांची खंडणी मागण्यात आली. पैसे नाही मिळाल्यास गडकरींना जीवे मारण्याची धमकी देण्यात आली होती.